جۋىردا مويىنقۇم اۋدانى اكىمدىگىنىڭ ءماجىلىس زالىندا جامبىل وبلىستىق كاسىپكەرلەر پالاتاسىنىڭ ۇيىمداستىرۋىمەن ەلدى-مەكەندەردەگى قوسالقى شارۋاشىلىق جەرلەرىن ءتيىمدى پايدالانۋعا بايلانىستى «جىلىجايدا ليمون ءوسىرۋ تەحنولوگياسى، ءجۇزىم، انار، بادام (ميندال) ءوسىرۋ» بويىنشا ماڭىزدى سەمينار ءوتتى دەپ جازادى Qamshy.kz اقپارات اگەنتتىگى.

سەمينار كەڭەسكە اۋدان اكىمىنىڭ ورىنباسارى باقىتجان قالىمبەتوۆ ءتوراعالىق ەتىپ، جيىندى اشىپ، جۇرگىزىپ وتىردى.

بەرەرى مول باسقوسۋدا اۋدانعا ارنايى ات باسىن تىرەگەن وبلىستىق كاسىپكەرلەر پالاتاسىنىڭ اگروونەركاسىپ ءبولىمىنىڭ باسشىسى ەرمەك دىلدابەكوۆ، اۋىل شارۋاشىلىعى سالاسىنداعى تاۋەلسىز ەكسپەرت، اگرونوم بەكمۇرات سەرعازى، وزبەكستان رەسپۋبليكاسىنىڭ ساراپشىسى، اگرونوم ماشالجون حۋشۆاكوۆتار ءسوز سالىپ، اتالعان بيزنەس-مودەلدەر شاعىن كاسىپكەرلىكتى دامىتۋعا باعىتتالاتىنىن ءارى بيزنەس-مودەلدەردى جۇزەگە اسىرۋ، سۇيەمەلدەۋ جانە ءتۇسىندىرۋ - سەمينار كەڭەستىڭ نەگىزگى ماقساتى ەكەنىن العا تارتتى.

ءسوز كەزەگىندە اۋىل شارۋاشىلىعى سالاسىنداعى تاۋەلسىز ەكسپەرت، اگرونوم بەكمۇرات سەرعازى: «جىلىجايدا قىزاناق پەن قيار، تاعى دا باسقا ءتۇرلى-تۇرلى كوك شوپتەر وسىرۋگە بولاتىن سىزدەر بۇرىننان جاقسى بىلەسىزدەر. ءبىراق ول قاجىرلى ەڭبەكتى كوپ تالاپ ەتەتىنى بەلگىلى. سونىمەن قاتار باعاسى دا تىم ارزان. ال ليمون جىلۋ مەن سۋدى كوپ قاجەت ەتپەيدى. جانە نارىقتا ءوز باعاسىن وسىرمەسە كەمىتپەيتىن، سۇرانىسقا يە ءونىم. ءبىز 2010-2011 جىلدارى كوشەت شىعارۋدى ۇيرەندىك. ءقازىر حالىقتى سول ساپالى كوشەتپەن قامتاماسىز ەتىپ جاتىرمىز. بىزدە ءقازىر ليموننىڭ 3-4 سورتى بار. ءبىرىنشىسى «تاشكەنت ليمونى F1» ەكىنشىسى «ليۋبيلەينىي S2»، ءۇشىنشىسى «مەيەر»، سوسىن «پاۆلوۆسكيي»، «پاندەروزا» دەگەن سورتتارى مەن ءمانداريننىڭ، اپەلسيننىڭ بىرنەشە سورتتارى بار. سونىمەن قاتار جەرگىلىكتى تابيعاتقا بەيىمدەلگەن اپەلسين جانە ماندارين سورتتارىمىز دا بار. جالپى، وسىمدىكتەردىڭ ءبىرازىن ءوزىمىز ءوندىرىپ، كوشەتىن شىعارىپ جاتىرمىز» - دەي كەلە، وسى باعىتتا اۋىل تۇرعىندارىنىڭ الەۋمەتتىك تۇرمىستىق تابىسىن جاقسارتۋعا بولاتىنىن سلايد ارقىلى كەڭىنەن ايتىپ، ءتۇسىندىرىپ بەردى. سونداي-اق، جيىنعا قاتىسۋشىلاردىڭ دەنىن «مويىنقۇم توپىراعى ليمون وسىرۋگە قولايلى ما؟» دەگەن ساۋال مازالاعانى انىق بولدى. بۇل ساۋالعا اگرونوم بەكمۇرات سەرعازى، ول كوپ جەرلەردى ارالاپ، توپىراق قۇنارلىعىن كەڭىنەن زەرتتەگەندىكتەرىن ايتا كەلە، مويىنقۇم – توپىراعى قۇنارلى، ليمون وسىرۋگە قولايلى جەر ەكەندىگىن اتاپ ءوتتى.

اتالمىش سەمينارعا 16 اۋىلدىق وكرۋگ، اۋىل اكىمدەرى جانە كاسىبىن جاڭادان باستاۋعا نيەتتى اۋىل تۇرعىندارى مەن جاستارى قاتىسىپ، ولار

بيزنەس سالاسىنداعى كوكەيدە جۇرگەن بارلىق ساۋالدارىنا تۇششىمدى جاۋاپتار الا ءبىلدى.